Jora-ripeng Part3 (tongsa)

DAKNA NANGGNI ARO GELNA NANGGNIRANG:
   Jora-ripeng seokanio maiarangko dakode ba gelode namgen uarangni gimin sandie nina.
Dakna nanggnirang
i) An.tangko Sing.e Nichengbo
   Jiro-ripeng seokana skang pante-me.trarang an.tangkon tarichengna nanganiko an.ching ui.baaha. Bangbata A.chik chadamberangan, mongsongbate songadamrango poraigiparangoni secondary gadang ba una komibataonin (class v-rangonin), sakoba silnika dake, salam on.grike, chitti segrike, pring-attam grongsimsime 'obosta namgija'o ga.akrongbea. Bilsi chu.ongjaoba, poraia chu.sokjaoba, gisik brikujaoba, obostaan namjahani gimin sing.e-sane on.aniona soka. Ja.mano indakgipa nokdangrangoni bang.batan neng.skime janggitangna nanganio ga akrongbea. Unigimin, jora-ripeng am.na skang iarangko chanchichengbo.
👉Dal.ani chu.ongahama? Be.en bimang gisik aro bilsio kraahama? Sorkari aro Mondolini niamo me.asa bilsi21 aro me.chik bilsi 18-na komiode bia ka.atna krakuja. Dal.a chu.ongkujaode sengna neng.niknabe.
👉Ja.tangko chadengna amgnokma? Jako kamrang dongama? Dongkujaoba janggi tangani cholrangko dakna cholignokma? Cholikujaode sengkubo.
👉Ma.a-paa ba nokdang gita jakgitel ong.ahama? Ma.watahama? Mitamrang ma.watgijan bia ka.e an.tangtangna aro maa-paani nokdangna boja ong.aia!
 i) Isolo Pangchakbo: 
   Pilakon Isolo pangchakna nanga gita jora-ripeng seokanioba Isol aro uni kattarango pangchake Uni skanio am.jringbo.
ii) Ka.satang-ko Nam.e Uibo:
  Mikchaenggipa ba mikchana chanchienggipa 'pante' ba 'me.tra'-ko name ui.na jotton ka.bo. Ui.masigrikna somai ra.chongmotna nanga. Be.en aro gisikni gita uni janggitangani, uni nokdang aro cholon bewalrangko ui.e ra.ani namen gamchata.
  Be.enni gita ui.e ra.ani: Mande pangnan be.enni gita sandichenga. Pante-metrarangba skanggipa mikronni mikchaakon am.chenga. Mande changroa, kan.dika, sakgipok, sakgisim, kni ro.a ba kan.dika, je rokomni be.en bimang ong.chong sakantikon saoba 'sile' nikgipade dongaia. Pilakkon Isol sanabade sile ong.ataha. Ian Isolni aiao inmanani kam mingsa ong.chongmota! Be.enni gita amadipet iarangko ui.e ra.na jotton ka.bo:
i) Bilsi-komidugaama, bang.dugaama ba namaiama?
ii) Be.eno maiba saa-ding.ani ba bigrianirang dongama dongja?
iii) Jat, nokdang, madrang mahari maikai ong.a?
iv) Cholon bewal, songsalo aro Mondolio janggitangani maikai ong.a?
v) Janggitangani cholrangko dakna choligenma ba jako kamrang dongama?
👉Gisikni Gita Ui.e Ra.ani: Be.enni gita tangrimna amaigen inenikoba gisik apsanjaode, ma.sichakgrikjaode neng.nikanirang donggen. Be.enni neng.nikgrikanirangna bate gisiko neng.nikgrikanirang namjabata. Unigimin be.enni gita seokani gamchata, indiba gisikni gita seokani gamchatbatgipa ong.a.
  Gisikni gita sandianio mongsongbate Kristoko ui.anian ong.gen. Sastroo Toromi' ine aganon, an.tangari namgipa mandeko miksongja. Kristoko ka.tongtango jokatgipa aro Gitel ine ra.chake gisiko gital dakako man.gimin mandekosa miksonga. Kristoko ui.ania gisik gita pilak namanirangni ja.pang ong.a. Nang.ni jora-ripengna chanchienggipa mandeara Kristoko ui.ama? Kristoko ui.gipasa gisikni gita dalrorona amgen.
  Be.enni aro gisikni gita sandie niahaon na.a ua pante ba metrani bilakani aro bilgrianirangko nikgen. Pilakba nama-rara ba namgija-rara ong.jawa! Unon bon.kame indake sing.e nina man.gen; "Anga ia pante ba metrako kimani ong.ode janggi tanga gimik be.en aro gisikni gita melie dongna amgenma?" Bi.ani gnang chanchie Isolni skana pakwate aganchakanina sengbo.

GELNA NANGGNIRANG:
   Adita gelna nanggnirangko ka.mao me.sokatenga:
i) Isolo pangchakgija jora-ripengko am.aniko gel.bo.
ii) Ui.gija jebasi mikchaa-ka.saaniko gelbo.
iii) Chu, drugs aro gipin pekgipa ringanirangko jakkalgipa, ku.namgijagipa ba gipin namgija cholon-bewal donggiparangko seokaniko gelbo. Bia ka.mano namataigen ine cchanchie 'namatna' bia ka.nabe. Ka.sabeoba, namatna nangode bia ka.aniona sokna skangan agangriksrange namatchenge bia ka.srangbo!
iv) Tangka-paisa dongana, gari dongana, dal.gipa aro mingsing-minggamako man.gipa mande ong.ana ka.saaniko gelbo.
v) Be.enni gita mangmang ka.saaigiparangko gelbo.
vi) Saniba jikgipa ba segipa ong.ode gelbo; seke dongna chanchinabe.
A.CHIK ME.CHIKRANGNA DINGTANGMANCHA:
   A.chik jatni dakbewalo me.chiksa nok-jam, bari-bagan, gamseng, matchu-matte pilakkon man.rikgipa ong.a. Unigimin, A.chik me.chikrang saoba pantena mikcha-ka.saengode; salam on.atna, chitti seatna miksongengode; ba saoba pante nang.ko namnikengode una aganchakna skang simsakbena nanga. Isolo bi.chengbo. Pante silana, kam dongana, mikron mikchaana altue ra.nabe. Na.ade 'nokna' ong.jaoba, ama-apani, A.chikni a.a chikode man.rikgipa aro jatni a.songni dakbewalrangko rakkinakgipa. Unigimin, ua me.asako seokode aro tik ong.grike ja.mano bia ka.niona sokode, A.chik jatna, nang.ni nokdangna, songna, Mondoli ba Toromna maiba gimaani ong.genma ong.jawa namedake chanchichengbo. Beben A.chik me.a me.chik sakantian dai gnang, indiba, 'man.rikgipa,' chongmotan, me.chikrangni jako ia dal.begipa dai gnang ine gualnabe.
SEOKANIKO DAKANIO ADITA DAKCHAKANIRANG:
     Seokaniko dakanio, kosako janapgiminrang baksa iarangoniko adita dakchakanirangko man.gen:
   i) Sastro: Isolni Katta Isolni skaniko mesoka, jora-ripeng sandianioba iano pangchakna gualnabe.
  Ii) Kristian ma.a-paa: Pilakni gimin skie on.china daiko Isol maa-paana on.aha. Uamangoniko dakchakaniko on.na man.gen.
 iii) Mondolini Pamong, me.a-me.chik deacon-rang ba bebe ra.anio kim.kimgipa Isolni manderang iani gimin dakchakaniko on.na man.gen.
  iv) Kristian bebera.anio pangchake jora-ripengni seokani gimin sea-jotanirang aro Film-rang.
  v) Jora-ripeng seokani gimin Conference, Camp, seminar ba gipin namgipa programmerango skie on.anirango bak ra.anichiba dakchakaniko man.gen.
  vi) Chadamberang an.tangtangni saksan bi.ani somoirango jora-ripengnaba bi.na gualnabe.

  Poraisoenggipa sakantinan Isolni dakchak Patiani ong.china. Na.a saksan ui-masie raenabe sakgiminrangba share kae ui.atbo. Mitela. Re.baengba part4 ong.gnokaha. uko ni.sengsona.