Joro Ripeng part3

 Skanggipa anga angni Salam,ko ni.soenggipa sakantina, Tanggipa Jokatgipa Gitel Jisu Kristoni bimungo salam on.a. Salam.

      Jora Ripengko seokani
 "Unon mande inaha, ian angni grengni greng, aro angni be.enni be.en...." Aba 2:23.
     Adamde joratangko seokna bang.ede sko sajaenggen ine chanchiatman.a. Ua somoio me.chikan saksasan! Ukoba Isolan rimbae on.srangaha! Dao gita pante sila, nomil sila bang.ode Adamba, "Ian angni grengni greng, aro be.enni be.en..'' ine aganna altua ong.jawakonchim! Indaken daororo bang.a chadambe pante aro me.trarang jajatokenga. Silara bang.beani gimin, iakoba ' an.tangni grengni greng' gita, uakoba 'an.tangni be.enni be.en' gita nikatman.aiana! Sila bang.dugaoba sko saanisa! Me.tra chananga, te.rokbalbal dakako nikode panterangba "aiwankonde ang.cham-de" ine chanchie ka.tong rongchu su.batokaiana! Nomilrangba pante silako nikpaode 'uanma bia? inmanataiana gisikode!
  Ka.tong rongchu su.ao, mikron miknapao, mikkang bimango pangchaken seokaigenma? Oi chadambe, indakede cholijawane! Sengku, iako knacheng; Silanide baikamjawa! Chanchichenggija seoken neng.nikanirango ga.akgiparangba bang.en donga.
   JORA-RIPENG RA.ANIO A.CHIKRANGNI CHAGRONGENGGIPA NENG.NIKANI -RANG:
    Jedakode mikkangchi jora-ripeng seoknasienggiparangna dakchakani ong.gen. an.ching da.ororo chagrongenggipa neng.nikanirangko niate nichengna:
(i) Dedrang aro ma.a-paa: Depante ba demechikni namnikako ma.a-paa namnikja, ma.a-paani baseako dedrang namnikskaja.
(ii) Mahari-madrang: A.chik songsalode maharini namnikpaanikoba nanga. Basakoba nokdango melioba mahari gita neng.nikanirang sokbaskaa.
(iii) Torom melija: Gipin toromni mande ba Kristianrara ong.oba denomination meligijanio golmal ong.anirang.
(iv) Jat: Gipin jatna mikcha-ka.sanape golmal ong.anirang.
(v) ke.gija: Ma.dong kimgrikanirang.
(vi) Dambedugaa: Agre dambeoni kimgrikanirang.
(vii) Sakgipinni jik ba se-ko seke kimanirang.
(viii) Seke katanirang aro bia ka.na skangan be.eno jik-se ong.soani.
       Kosako adita neng.nikanirangko see mesokaha. Jora-ripeng seoknasienggipa pante-metrarang iarangko gelna ba indonga neng.nikanirango ga.akjana seokmitingon simsakbena nanga.
  SEOKANI ROKOMRANG:

Namen siksakbee seokna nanga inede ui.aha. "Simsakbee' inon maikai? Ia sing.anina aganchakna altua ong.ja. Jora-ripengko 'indakesa seokbo' ine readymade aganchakaniko on.nade neng.gen. Jat , nokdang, madrang-mahari, songsal aro toromni dakbewalrangoba pangchakanide dongaia. Minggipin bangbata skigiparangni skiani aro segimin ki.taprangoba an.tangtangni cha.tote nikgimin aro manderangni dakrongbewal ong.rongbewalko nie agan-skiani aro sea-jotanirangkosa nikbataia.
(i) ISHAKNA JORA-RIPENG SEOKANI:
Sastroo Ishakni jik kimaniko serikani gnang. Una uni pagipa Abrahamsa Jora-Ripengko sandie on.aha. Iako chanchiate niode skangni somoirango badiaba jat aro a.songni dakbewalrangode ma.a-paasa dedrangna jora-ripengko sandie on.a ine nikgen. Da.alonaba mitam jat aro nokdangrango ia dakbewal dongengkua, iadiba ia chasongni pante-metrarangde iako gitcham dakbewal ba 'outdated' ine chanchia.
(ii) A.chikrangni Dakbewal: 
A.chik jatni aganritingbaani aro sea-jotanirangko niode, Bonepa-ni a.tila-o tom.anio me.chikko noko done gritangko chawari rimna tik ka.aha. Iako chanchiate niode siangni A.chik jatni dakbewaloba jora-ripeng seokanio ma.a-paa, mama-ada ba madrang maharini jak gnang ine nikgen. Indaken skangni somairangonin gritangko chawari sikdraani aro 'ja kilding' kae nokkromna kanganirangko dakbaaha.
(iii) Da.ororoni Pante-metrarang:
Chasong gitalni pante-metrarangde an.tangtangan namnikatangko sandie, mikcha-ka.sae jora-ripengko seoke kimgrik-donggriktokenga. Ukon bang.an 'love marriage'-an ga.subata, nambata ine agana daktoka!
 Badia rokomni seokani nambata, sandie tik ka.e on.ani ba an.tang namnikako sandianima, ukode iano jerara.grikna miksongjaenga. Am.rikkitgrikode minggnion 'nama' ba 'namgijani'-rangko nikgen.
        (Kema ka.bo anga tongsako dao seatna nengaha unigimin changgipinna don.ainaha part3nin bonkuja.)