Jora Ripengko seoke Ra.ani

                       Aganchengani
Anga jora ripeng iako senadeuigipa masigipa ongpaja indiba adita uigimin ba skia mangiminko anga nangnaba ba saksara sakgipinna dake watgrike (share) uigrikna.Jora Ripengko seanide mingsongde. Jora Ripengko maina nanga? An.tangna baksako aro maikai seokgen? Mea me.chik baksa tugrikani ba me.chik mea baksa tugrikaniara kraiama? Me.chikrang obosta namgijao ga.akora maiko dakgen aro bisa galanira mai ongskagnok? Iarngko anga sulsuldake se.atna namnikenga. Changsano xhugmiko manjanaba donga indiba episode dake ba pod1 2 dake se.atgen.
Skangipa ian adita cholrangchi seoke ra.ani onggen. ,..Uni see ra.na nangna ramani gimin uan skie on.gen. Git.25:12.
Mandera rokom gni donga mea aro me.chik. Mande agilsako janggitangna jora ripengko nanga. Ia jora jipengko seoke rana jajaaniko bangbatan man.a. Skanggipa chadamberang an.tangna seoke ra.anio nokdangna, songsalna ba Mondolio janggitangna kragipa badia ong.a aro badiako seokgen uko basee ra.chengna nanga. Chadamberang ia seoke ra.anio name chanchigipa aro niksamsogipa ong.na nanga. Ongjaode balwao balpongchapako man.gipa do.kimil aro jabolrang gita ongaigen. Uarango pangkamani aro miksongani dongja. Biap damsaoni damgipinona baljojoako man.e basakobade mitchibegipa aro ong sigipa biaprangosa on.chongea! Mandeba miksonga gri, niksamsoagri, name chanchichenggija jima,ko ja.rike simsakgija dakbrokaiode balwao balpongchapenggipa ritchenggipa do.kimil aro jabolrang gitan badiaba mitchigipa aro ongsigipa biapo onchonge, janggi tanga gimik skimna nangnaba gnang!
Banga seoke ra.na nanganirangoniko iano minggitam mongsonggiparangko mesokatenga. Uarang; (1) Isolni songnok aro Toromko seokani, (2) Janggi tangani cholko seokani aro (3) Jora Ripengko seokani.
(1) Isolnini songnok aro Toromko seokani:
Be.enni gita an.ching ia a.gilsako tangkamjawa. Mandeni janggi an.tangni ong.ja. Uko on.gipa aro rapilna bil gnanggipa Isol ong.a. A.gilsak gimikni ui.ani, gamseng, man.e cha.ani rasong mikkim aro mingsingminggamaniko man.oba, janggini Nokgipako seokchengjaode mandeni pilak gnangrang ong.gramaianisan. Jisu agana: " Maina mande a.gilsak gimikkon man.oba, an.tang janggiko gimaatode, ua mai biteko man.pati?" Mitamrang gamko seokchenga, mitamrang ui.aniko, Mitamrang kusi katchanirangko, indiba banggijasan Isolni Songnok aro Toromko seokchenga. Indiba Sastroode agana: "...Uni songnok aro toromko am.chengbo, unon ia pilakkon na.simangna on.dapgen". Uni gimin Isolni songnok aro toromko am.anian mandena skanggipa aro nangchongmotgipa ong.a. Janggi tanganio pilak seoke ra.anirangan iano pangchakgen.
(2)Janggi tangani cholko  seokani:
Isolni singnok aro toromko seokahaoba, Jisuo bebe ragipa sakanti ia a.gilsako balwa mangmangko rangsite, chi mangmangko ringe tangna amjawa. Cha.ani ringani, gana-chinani, nok jam, tangka-paisa aro banga nanganirang gnang. Unigimin a.sako be.en an.china nanganirangko man.na a sakni kam ara tangka paisa man.chi cholrangko dakna nangchongmota. Poraigipa chatdro chatdrirang aro daldrobaenggipa chadamberango, "poraia  matchotemai kamko ka.gen? Ine sing.ronga. Ia singani namen gamchata. Mai kamnko ka.gen? Isolna chu.gimik on.kange dangdike on.genma? Sorkari ongimin kamko kagenma? Ongjaode an.tangan maiba gipin kamrangko dakgenma? Kamko seokengon name chanchichenge, obostarangko nie aro senggnange miksonganiko donna nanga.
(3)Jora Ripengko seokani:
Gittamgipa mongsonggipa seokaniara jora-ripeng, seokani ong.a. A.gilsako duk-suk chakrime janggi tangrimpana sako seokgen? Ia seokani namen gamchata. Na.a jeko seokgen, ua measa ba me.chik baksaan sia aro sijana kingking nokdang ba.ku dake, songsalo, mondolio aro a.songo janggi tangpagen. Unigimin jora-ripeng seokaniko altuae rana nangja. Iani gimin an.ching ia chongipa angni seanio (sangikcalmomin blogspot.com) nianggen. Anga Isolni nama kattani gimin aganprakgipa saksa skia manbegipa mandeni seanio pangchake se.anggen. Hai an.ching upload ka.ako sengsoe niangna. Mitela.